分享阿甘的置業故事

網友阿甘剛完成首次置業，在散仔筆記內分享了他的置業經過，散仔拿出來與大家分享．

雖然阿甘的置業是個別例子，但也帶給了我們幾個信息．

１．目前自住（首置）按揭申請息率及優惠相當唔錯．
２．港島東的租務回報一點也不差．（亦可以話俾大家知，散仔08年的第二擊亦是在港島東．）
３．港島區業主開始願意落價，而成交價大約是接近估價的下限（無裝修）．

雖然散仔不願用家人的物業作抵押，但各施各法，大家自行參考及評估風險．

－－－－－－－－－－－－－－

阿甘 提到...

謝謝你的回覆，其實今次置業都真係頗為順利，唔介意阿甘又係度又分享一下啦﹕

自從我第一次留言後，就積極實行置業大計，首先是搞首期，因為母親的樓(約10年樓)係全額付錢(老人家買野唔鍾意借錢)，所以現在息咁低，就借屋契做擔保自己供按錢出來作首期，息口都算不錯，2.5%。

之後就睇樓，本身住港島東，就唔熟唔買(就算自住出租都有兩手準備)，target條件有幾個﹕

1 租務回報高，因為有得守。

2 買屋苑唔買單棟，因為始終首置，好多野唔熟，屋苑較有保障，唔需要付昂貴維修，費，相對又唔會有咁多陰濕野。

3 交通方便，近地鐵。港島樓加地鐵附近物業，阿甘覺得簡直係「信心保證」，跌極都有個譜，哈！

4 唔買新樓，新樓發水嚴重，感覺「被騙」，舊樓連窗台都無，又有長期「往績」，有績可尋。
港島東合乎上列條件的不多，篩選之下便到了一個屋苑睇樓，當時(約6月)d盤都偏貴，普通的盤都要280以上，算太貴。

其中一個無裝修的中層單位，當時開價288萬，因為太貴，而且幸運地首期未到手，所以拖了一排，之後個市就跌。

到7月尾，經紀打黎話，同一個單位，可以落到250實價(佢話有另一客傾到247，業主叫250「企硬」，最後拉倒了)，咁佢就打黎問我有無興，我就on居居「信左佢」(其實都有懷疑，但係之前既成交真係少用去到咁既價)。

銀行估價方面，匯豐估263，恒生估248，中銀253。

最終我自己回想返都心急左d，開票245傾價，最終中午12點開票，6點幾經紀打黎話傾成，就咁搞掂左。

按當時租金計，租務回報都去到6.3%，算是不錯了。

上個星期打比另一經紀問盤睇下市況，佢話個市雖然靜，但係業主好硬，附近屋苑都無乜點跌，我買那個屋苑，最平同類單位開價都275，而且只有幾個盤，我都信佢((因為佢未知我成左，應該好盡力幫我搵盤，想促成生意，騙我無盤都無用)。

所以就咁睇，我買個單位可能唔係最低，但一定唔會買貴(最少呢一刻，遲下再跌價就唔知啦)
不過回想返，應該可以再「睇定一點」，不過首次置業，可能都會心急d..........

故事聽完啦，多謝各位！