包租公

有朋友之前買股票賺落，之後買樓收租．但買咗後又發覺放租好煩，又要裝修，又要議價，又俾經紀煩，支出又多，無租客又要放空租，放租後又俾租客煩，又怕租客唔交租，所以有點後悔．

散仔會話俾你聽，如果你想用買股票收股息的心態，來買樓收租，你會有點痛苦．

正如散仔朋友所經歷，因為樓宇不是標準化的投資工具，每個單位都不同，所涉及的問題也會較多，所以要花時間及花金錢去處理這些問題．

但，散仔其實幾享受整個過程．

睇開散仔筆記的網友及讀者都知，散仔除了睇漫畫及睇樓外，基本上無其他興趣，又無咩朋友，所以買樓收租對散仔來說，都可算是一種娛樂．

裝修或維修差不是買二手樓放租必經的過程．就算是裝修好才放售的二手單位，都可能會有小問題．更何況是上手用緊，或殘裝的單位．

一般來說，散仔為免將來麻煩，通常都會在放租前，把單位有問題的部份或預計有問題的部份都會事先處理．雖然所需的費用會多少少，但散仔打算長期收租，所以成本計起上來都化算．

一來租客可以住得舒服一點，二來又唔使散仔成日擔心．

一些人在收樓後會叫鐘點阿姐幫手打掃．但散仔就好少咁做，一方面是孤寒，慳得就慳，另一方面是想親力親為，多在單位內留連，睇吓會唔會有其他小問題．

所以，一直以來，單位在放租後，租客都好少叫散仔上去維修．

散仔放得租的單位，一般質素都唔差．豪裝就未必係，但企理至靚裝就唔少得，所以承租都算快，而租金一般會高於市場2-8％．

在一般的屋苑，除非是特式單位及有特別要求的租客，要租金高於市價10%不是那麼容易，大家定價時要注意這一點．

因為散仔部份物業位於港島的關係，租客的類別頗多，有ABC，有韓藉，有內地註港員工，真的是英語，普通話，廣東話都出齊．散仔有時又覺得幾好玩．

另外，又因為散仔持有多個單位，所以月頭，月中，月尾都有租收，睇著銀行戶口的數字慢慢上升，又有穩定的現金流，作為守財奴的散仔，當然會開心．

對散仔來說，其實買樓收租都幾好！