跌到什麼價位?

陳小姐 提到...

本人只係近兩個月才留意散兄文章,覺得散兄見解十分獨到, 亦相信散兄所言第四季回升.

但問題係第三季會跌到什麼價位, 第四季就算回升, 亦只係小陽春, 到明年加息潮一起, 樓價又如何??

現時睇各地產公司記錄, 樓市成交少, 租盤成交多, 可以反映出承接力減少.本人亦澄清非淡友, 只係想大家討論一番, 以便決定投資方向.


回覆陳小姐，

首先謝謝你的讚賞．

在香港做樓市淡友並不容易．散仔記得五月時在某處留言，話個別樓盤還有5-10%的下調空間，得到的感覺是，"散仔是個找個麻煩的人"．

（其實做好友都不容易．當你同主流意見有沖突時，都會有這樣情況．）

所以，在這裏，你無須澄清是否淡友或好友．散仔只需要知道你有否想清楚你的問題．

講翻正題，散仔覺得你需要問自己:

以一個二百萬的單位計，月供7500元左右，是否你能力負擔的範圍?該單位的居住質素，你是否覺得合適?

加按息至4.75厘，月供增至9000元，你又是否覺得合適?生活會否有壓力?

（記住，散仔無暗示4.75厘是頂．）

散仔覺得你需要知道這些問題，比知道樓市何時見底或跌到什麼價位更加重要．

其實捕捉浪底浪頂，從來都是一件困難的事．無謂勉強．

當然，如果你想知道最新市況，最新樓市預測，可參考散仔的文章．散仔自問比其他分析，做得更快，更準，更具前瞻性．(又要自我吹噓一下．)

但話明是預測，你要有心理準備，預測未必準．

至於09年，散仔暫時未睇得通透，但感覺仍然是偏好． 但不明朗的因素確實很多．

而關於息口，下周(或遲一些)抽時間再講． 之前應承咗寫的都脫稿，無辦法．

你要相信的，不是散仔，而是你自己．你要帶有批判性的眼光來看散仔筆記，如果無，散仔勸你唔好睇．

你話到明要做投資決定，咁散仔都要重覆嗰句，賺咗錢，唔使多謝散仔，輸咗錢，唔好搵散仔，自己做事，自己負責．