樓市警號

唔好一見到個標題，就以為散仔又要寫一些看淡樓市的言論．散仔重申，散仔係睇好未來五年香港樓市的發展．做投資者，要分清短期波動及長期大勢．

講翻正題，散仔成日同朋友講目前樓價好平(其實06年底己經開始講)，朋友們一是話散仔發神經（百幾二百萬都話平），一係就以為散仔好富貴，口氣大（其實散仔每月的使費真係好草根）．

對於樓市，散仔會定下三個警號：１．供款比例，２．還款年期，３．按揭成數

供款比例就係供樓負擔佔入息的比例，散仔通常都貪方便，會參考美聯的負擔比率就算．散仔覺得，供樓負擔如果超過入息的一半，就已經過重，如果超過6成，就會好吃力，而且影響正常生活，所以散仔其中一項樓市警號，是超過60%的供款比率．

一般人的工作年期約為40年，所以散仔認為，如果還款年期為20年，平均計一生人有機會買到兩層樓，好合理．如果還款年期長達40年，人生的目標就係為咗層樓，這就未免太辛苦．如果還款年期長達80年，要兩代人才能完成供款，那壓力實在太重．所以散仔另一項樓市警號會係40年的還款年期，但係30年己經需要警覺．

散仔唔知道點解金管局把按揭成數定七成為最高上限，但散仔感覺有其合理性．作為置業者及投資者，應盡量避免處於負資產的困境（如有資金需要，負資產未能支持有關需要），七成按揭正好為資產提供安全的緩衝．

反而散仔認為按揭公司為投資者提供八成半按揭是不可思議．試想一下，無論你的置業目的是從買賣交易賺取差價，或者是透過租務提供穩定的現金流，其實都是一門生意．點解按揭公司會為這門生意提供八成半的槓桿，是否這門生意特別安全？（這一段網友可以唔使理，散仔只係發勞騷）

宜家知點解話散仔話樓價好平．一．就係目前的供款比率為30-40%，供樓的壓力唔算好大．二．目前大部份的按揭還款年期為20年，而散仔部份朋友更可以做15年．咁你話D樓算唔算平呢？三．一般人都以七成為按揭上限．

以上三個警號，散仔只係從一般的生活角度出發，為散仔提供量度市況的工具．每個人都可因應自已的承受能力，作出不同的調整．

散仔本來預計寫樓市唔會有好多嘢寫，但一寫就停唔到．有時見到些不合理的事，唔講又唔得，可能係因為散仔仍然流著憤青的熱血，哈哈！