搵經紀

在香港，自讓盤始終都未流行，所以想買樓，都好依靠地產經紀幫你搵盤同還價．

但是，除非你有朋友介紹，在香港搵經紀其實都幾撞彩！

行入間代理行，除非你有極速的讀人能力，找到心儀的經紀，否則，通常都是坐最前排或手頭上無嘢做的經紀來招呼你．

至於，該經紀是否進取，有否耐性了解你的需要，對該區樓盤是否熟悉，能否介紹該區或該屋苑的價格分佈，能否配合你的買賣策略？就要遲些才知道．

散仔就遇到個經紀，當時業主開135萬，散仔還120萬，個經紀唔肯同業主講，散仔無法就加到125萬，個經紀都仲話唔得，話無可能．到咗第二日，個單位成交咗，價錢是123萬．個經紀即刻同散仔Say Sorry！目前，個單位己經升到190萬．（補充：同買家還價是經紀的責任，理論上佢唔可以拒絶．）

散仔覺得有時買樓是講綠份，所以都無追究落去．不過，能遇到一個能了解自己買賣策略，積極配合跟進的經紀，有時是可遇不可求的．

當然，身為買家，都要講多些自己的想法，讓經紀可以配合你的行動．

有時，到咗一些新區，散仔通常到會企係地產舖頭門前一陣，等地產經紀出嚟招呼，這些經紀質素如何是一件事，但最少，這些經紀是比較進取的．

如果你是初到貴境，最好就走多幾間代理，增加盤源是其次，最重要是揀選合適的地產經紀．

如果你有好的地產經紀，不妨在這裏介紹一下．