裂口式下挫

裂口式下挫不是講股市，今次是講樓市．

在這兩個星期，散仔在各區有聯絡開的經紀，不約而同地向推介散仔筍盤．

這些筍盤價，在一個月前，你未必可以想像到．

最令人不是味兒的事，這些筍盤雖然筍，有些比市價下調了15%，但仍然未能售出．

不論是港島區的太古城，康怡花園，九龍的德福及淘大，或者是新界區的第一城及沙中，樓價均出現裂口式的下跌．

而散仔亦見到，今次有銀行估價率先下調，帶動樓價下挫的情況．

至於租金方面，亦出現了大幅度的下挫．租金可以從年初的高位，下跌了10%至20%．

如果你相信代理的租金指數，租金已下跌了兩個月．

如果你一直有睇散仔筆記，其實你從農曆年後（即八個月前），已經知道租金已經往下調．

當報章講租金創新高，第一城二十蚊一呎笑呵呵的時侯，散仔已經好清晰講俾大家知，租金正在受壓的事實．

市場點解會出現恐慌，是因為消息突如其來．但這些消息，這些情況，其實一早已經存在，只是大家不願去相信及接受．

對散仔來說，如果連市場信息都不願意去接收，那如何作出合理的分析呢？

在香港，以散仔所見，對樓市有中肯的評論並不多．

而要了解樓市，散仔覺得其實比了解股票容易（最少你不用看財務報表）．只是，你要用多點腳骨力．

要了解市況，一定要多走兩步．坐在家中，永遠只可以落後於人．