牌面計，一副爛牌

近這兩個星期，真的是消息多籮籮．正確D來講，應該是負面消息一大堆．攪到散仔成日要對市況吹水，個買樓收租系列都無檔期Post．

宜家市場對樓市前景的睇法都幾負面．昨日睇有線新聞，頭條是匯豐帶頭加按息，跟著就講長實將未完成的工程售予美國退休基金，暗示是發展商散貨行為，希望帶出目前樓市正受雙重打擊的信息．

銀行倒閉，機構裁員，經濟衰退的等消息此起彼落．而近日，各大出名的樓評人，包括施永青，劉祥發，及各大代理，均有睇淡樓市的言論．

負面消息太多，散仔都驚記錄唔晒．

面對這個環境，散仔又點睇呢？散仔又不妨吹下水．

散仔之前話本地消費信心唔錯．但經過這幾個星期的市場大幅波動，金融體系動盪後，散仔預期一般市民都希望留多些錢旁身，消費信心將會減弱，這對經濟的實質增長及市場的資金流動都有負面影響．

而且，颱風信號仍然懸掛，市場前景極不明朗，投資意慾很低．經濟前景都唔好，樓市前景又點會好呢？

匯豐加按息，新購樓宇的每月利息支出增加，加重了供樓負擔，而且亦反映了資金成本上升的現象．

另外，之前散仔已經講過，部份港商在內地經營困難，減少資金回流本港，豪宅市場將受挫．雖然內地政策開始有扶持中小企的趨勢，但要恢復元氣，又談何容易？

牌面計，真的是爛牌一副．樓市調整需要長一些的時間．

但凡事也不用太悲觀．

在爛牌中，散仔仍然看到一些利好因素，如樓價處於適中或略低水平，承擔能力合理，一般人的借貸水平偏低等，都是樓市將來的推動力．

雖然目前是一副爛牌，但又有可能遲一些派多幾隻牌，一副爛牌又可以變成好牌呢？

不用過份悲觀，亦不可盲目樂觀．做了合適的財務安排，就可以進可攻，退可守．

雖然是牌面差，但散仔目前覺得仍未需要改變樓市會在第四季回穩甚至回升的看法．

當然，如果散仔見到香港經濟明顯轉差的趨勢，會及時改變有關睇法，並告知大家．

最後，散仔又補充一下對長實賣樓的看法．

市場對長實出售位於西半山干德道16至18號及廣播道81號兩個未落成的物業都非常負面．主要因為覺得長實有散貨之疑．

但散仔覺得此消息屬於中性，甚至有點偏好．

雖然散仔都覺得長實的賣樓時機準繩，而每次賣樓，散仔都覺得有散貨之疑．

但今次長實賣的是未落物業，而且干德道的物業預計入伙日期更是2012年，可以賣得都應該是2010年左右．

作為生意人，如果利潤已深，何不將資金先行回籠．在市況淡靜時，尋找更多機會，為自己創造更多時間值呢？

而且今次的售價也不低．當然，可以肯定的是，長實都唔覺得豪宅在短時間可以再度爆升，這可從賣廣播道的物業中看到．

所以，長實這次賣樓，散仔覺得只是中性，並唔覺得好負面．

另一方面，美國退休基金選擇現在在香港大手購買物業的行為，實在可圈可點．