最新市況 - 沙田第一城

散仔身體力行，利用復活節假期周圍去睇樓．目的地為炒家天堂之一，沙田第一城．

以散仔所見，睇樓活動並不活躍，有部份經紀企係舖頭門口兜客，大部份經紀係舖頭Call客．

問經紀點解咁靜，佢地解釋：通常新年後會靜，而且因為長假期，ｄ客去咗旅行，所以無咩人去睇樓，預咗啦！（散仔心諗，新年前肯定你唔會咁講！）

睇咗６至７個盤，主要以395及410盤為主（上車一族及炒家至愛）．散仔覺得業主開價趨於理性，而且議價空間大咗好多．亦有個別摩貨盤想降價盡快去貨，但數目唔多．

至於租務回報，單位連同基本裝修，表面回報為4.8厘，對散仔來說還可以，但唔算好吸引．

目前市況與散仔預期的都幾一致(又要認叻！)．網友可以多睇多比較．

下個星期可能會到另一個炒家天堂：淘大花園，再了解最新市況．